పెద్ద సినిమా హక్కుల కోసం ఓటీటీ సంస్థలు భారీ మొత్తాన్ని ఖర్చు పెట్టేందుకు పోటీపడుతున్నాయి. రీసెంట్ గా ప్రభాస్ సలార్ కోసం అమేజాన్ 100కోట్లను వెచ్చించేందుకు చూస్తుందనే వార్త రాగా…తాజాగా రాజమౌళి మూవీ త్రిపుల్ ఆర్ కోసం స్టార్‌ నెట్‌వర్క్‌ సంస్థ భారీ మొత్తాన్ని ఎరగా వేస్తుందని సమాచారం. ఆర్ఆర్ఆర్ మూవీ ఓటీటీ రైట్స్ అక్షరాలా 200 కోట్ల రూపాయలకు కొనుగోలు చేస్తున్నట్లు ఓ వార్త బాగా వైరల్‌ అవుతోంది. తెలుగు, తమిళం, కన్నడ, మలయాళ భాషలతో పాటూ హిందీ హక్కులను సైతం స్టార్‌ నెట్‌వర్క్‌ సొంతం చేసుకోబోతున్నట్లు టాక్‌ నడుస్తోంది. అంటే సినిమా హాళ్లలో రచ్చ చేసిన అనంతరం ఆర్ఆర్ఆర్ నేరుగా ఓటీటీ వేదిక డిస్నీ + హాట్‌స్టార్‌లో సందడి చేస్తుందంటున్నారు. ఇక ఓన్లీ ఓటీటీ కోసమే 200 కోట్ల డీల్ జరిగితే థియేట్రికల్ రిలీజ్ బిజినెస్ ఇంకెన్ని సంచలనాలు సృష్టిస్తుందోనని నోరెళ్లబెడుతున్నారు సినీజనాలు. అయితే ఈ వార్తపై ఎలాంటి అఫీషియల్ అనౌన్స్ ఇంతవరకు రాలేదు. ఇదే నిజమైతే మాత్రం ఓటీటీలో కూడా ఆర్‌ఆర్‌ఆర్‌ సరికొత్త రికార్డులను తిరగరాయడం ఖాయంగా కనిపిస్తోంది. దాదాపు 350 కోట్ల రూపాయల భారీ బడ్జెట్‌తో నిర్మాత డీవీవీ దానయ్య ఈ సినిమాను సుమారు పది భాషల్లో నిర్మిస్తున్నారు.