కృష్ణవంశీ సినిమాలంటేనే ఓ ప్రత్యేకత ఉంటుంది. భారీ తారాగణమే కాదు…స్పెషల్ స్టోరీ
ట్రీట్మెంట్ కనిపిస్తుంది. ప్రస్తుతం రంగమార్తాండ సినిమాతో బిజీగా ఉన్న క్రియేటివ్ డైరెక్టర్… మహిళా ప్రాధాన్యం ఉన్న సబ్జెక్ట్ త సినిమా తీసేందుకు రెడీగా ఉన్నారట. అయితే ఇందులో శ్రీదేవి తనయ జాన్వీ కపూర్ అయితేనే బాగుంటుందని ఫిక్స్ అయ్యారట. ఇక ఈ మూవీతోనే బాలీవుడ్‌ హీరోయిన్ జాన్వీ కపూర్‌ తెలుగు తెరకు పరిచయం అవుతుందనే టాక్ ఊపందుకుంది.

లాక్‌డౌన్‌ టైంలో కృష్ణవంశీ ఓ అద్భుతమైన కథను సిద్ధం చేసారట. దానికి సంబంధించి స్ర్కిప్ట్ వర్క్ కూడా పూర్తయిందని సమాచారం. ఇదే సమయంలో జాన్వీ కపూర్ లీడ్ రోల్ చేసిన ‘గుంజన్‌సక్సేనా: ది కార్గిల్‌గర్ల్‌’ చూసిన కృష్ణవంశీ…ఆయన రాసుకున్న స్టోరీకి జాన్వీ అయితేనే న్యాయం చేస్తుందని భావించారట. ఈ విషయమై ఇప్పటికే బోనీకపూర్‌తో సంప్రదింపులు కూడా జరిపారట. కానీ అటు నుంచి సమాధానం రావాల్సిఉంది. తెలుగు అంతఃపురం చిత్రాన్ని బోనీ నిర్మాతగా హిందీలో ‘శక్తి: ది పవర్‌’ గా రూపొందించారు కృష్ణవంశీ. అప్పటినుంచి కృష్ణవంశీ, బోనీకపూర్ మధ్య మంచి సాన్నిహిత్యమే ఉంది. ఇక జాన్వీ కపూర్ తప్పకుండా కృష్ణవంశీ సినిమాతోనే టాలీవుడ్ ఎంట్రీ ఇస్తుందనే చర్చలు మొదలయ్యాయి. ప్రస్తుతం జాన్వీ కపూర్ నటించిన రూహి విడుదలకు సిద్ధమైంది. ‘గుడ్‌లక్‌జెర్రీ’, ‘దోస్తానా2’ లాంటి చిత్రాల్లో నటిస్తూ బిజీగా మారింది.

అందాలరాశి శ్రీదేవి త‌న‌య జాన్వీ క‌పూర్ తొలి సారి థ్రిల్లర్ ప్రాజెక్ట్ తో మనముందుకు రాబోతుంది. రూహి అనే పేరుతో తెరకెక్కిన ఈ చిత్రంలో జాన్వీతో పాటే రాజ్ కుమార్ రావు కీలక పాత్రల నటించారు. వ‌రుణ్ శర్మ, పంకజ్ త్రిపాఠి వంటివారు మరికొన్ని పాత్రల్లో కనిపించనున్నారు. అయితే ఇందులో జాన్వీ…దెయ్యంగా భయపెట్టడం విశేషం. చూస్తుంటే నటనతో బాగానే ఆకట్టుకునేలా ఉంది జాన్వీ. మార్చి 11న ఈ సినిమాను ప్రపంచవ్యాప్తంగా రిలీజ్ చేస్తున్నట్టు ప్రకటించారు మేకర్స్. రీసెంట్ గా రూహీ ట్రైల‌ర్ విడుద‌ల చేసారు. ట్రైలర్ చూస్తుంటే కామెడీతో పాటూ ఒళ్లు గగుర్పొడిచేలా డైరెక్టర్ చిత్రీకరించినట్టు తెలుస్తోంది. డైరెక్టర్ హార్దిక్ మెహతా ఈ కామెడీ థ్రిల్లర్ తో గట్టి సక్సెస్ సాధిస్తాడనే నమ్మకంతో ఉన్నారు.
గతంలో రాజ్ కుమార్ రావు, శ్రద్ధా కపూర్ కలిసి నటించిన మూవీ స్త్రీ. ఈ చిత్రానికి సీక్వెల్ గానే రూహిని రూపొందించినట్టు టాక్. మొదట్లో రూహీ అఫ్జానా అనే టైటిల్ ఈ ప్రాజెక్ట్ కి ఫిక్స్ చేయ‌గా, దానిని ప్రజెంట్ రుహిగా మార్చారు. గతేడాది రూహీ రిలీజ్ కావాల్సింది కానీ క‌రోనా కారణంగా వాయిదా ప‌డింది. మొత్తానికి మార్చి 11న భయపెట్టేందుకు సిద్ధమైంది.