పవర్ స్టార్ పవన్‌ కల్యాణ్‌కు జంటగా పూజా హెగ్డే కనిపించడం దాదాపు ఖాయమైనట్టేనని తెలుస్తోంది. హరీశ్‌ శంకర్‌ డైరెక్షన్ లో పవన్‌ కల్యాణ్ హీరోగా మైత్రీ మూవీ మేకర్స్‌ ప్రొడక్షన్ హౌజ్ ఓ సినిమాను నిర్మించనుంది. ఇందులో పూజాను ఫైనల్ చేసారని టాక్. తాజాగా ఆమెకు లుక్‌ టెస్ట్‌ కూడా చేసారు. హరీష్ శంకర్, పవన్ కాంబో మూవీలో అనుకున్న లుక్‌ను ఓకే చేసారట. అయితే మెగాఫ్యామిలీలో ఇంతవరకూ పవన్‌తో నటించలేదు పూజా హెగ్డే. పవన్, పూజా కాంబినేషన్‌లో మొదటి సినిమా ఇది. వీళ్లిద్దరి కాంబినేషన్ లో తెరకెక్కించే సీన్స్ కూడా చాలా కొత్తగా ఉంటాయని, ఈ సినిమాకు ఇవే కీలకమని చెప్తున్నారు.

మరోవైపు… హరీశ్‌ శంకర్‌, పూజా హెగ్డే కాంబోలో వస్తోన్న మూడో చిత్రమిది. మునుపు ఆయన డైరెక్ట్ చేసిన దువ్వాడ జగన్నాథమ్‌, గద్దలకొండ గణేష్‌ సినిమాల్లో ఆమె నటించారు. ఆ రెండు కూడా మెగా హీరోల సినిమాలే. ప్రస్తుతం పవన్‌ నటిస్తోన్న ‘అయ్యప్పనుమ్‌ కోషియుమ్‌’ రీమేక్‌, ‘హరి హర వీరమల్లు’ సినిమా షూటింగ్స్ తర్వాత హరీష్ శంకర్ సినిమా ప్రారంభం కానుంది. గబ్బర్ సింగ్ తర్వాత హరీష్, పవన్ కలయిక రిపీట్ కానుండటంతో సినిమాపై బాగానే అంచనాలున్నాయి.

టైం తీసుకొండి…పర్లేదు..కానీ ట్రెండీ టైటిల్ తోనే రావాలంటున్నారు స్టార్ హీరోలు. ఇప్పుడు మేకర్స్ కి టైటిల్ వెతకడమంటే కత్తి మీద సాములా మారింది. అందుకే ముందే సినిమా పేరు ప్రకటించకుండా వర్కింగ్ టైటిల్ తోనే షూటింగ్ కానిచ్చి…ఇదీ అదిరే టైటిల్ అనుకున్నప్పుడు అనౌన్స్ చేస్తున్నారు. ఇప్పుడలానే ఉగాది కోసం ఎదురుచూస్తుంది బిబి3 మూవీ టీమ్. ఎందుకంటే మూవీ రిలీజ్ కి ఇంకా ఎక్కువ టైం లేదు. ప్రస్తుతం శరవేగంగా షూటింగ్ జరుపుకుంటోన్న బిబి3 ప్రాజెక్ట్…మే 28వ తేదీనే ప్రేక్షకుల ముందుకు రానుంది.

బాలకృష్ణ-బోయపాటి సినిమాకు సంబంధించి ఎన్నో పేర్లు వినిపించినా…చివరికి గాడ్ ఫాదర్ అన్న టైటిల్ ఫిక్సయినట్టు చెప్తున్నారు. బోయపాటి మోనార్క్ అనుకున్నా…గాడ్ ఫాదర్ పేరే ఖరారైనట్టు టాక్. కాదు బాలకృష్ణ అఘోరాగా కనిపించనున్న ఈ సినిమాకి ఏదో సంస్కృతపదాన్ని టైటిల్ గా పెడుతున్నారనే ప్రచారమూ జరుగుతుంది. అయితే బాలయ్య సినిమా అసలైన పేరేంటో తెలియాలంటే మాత్రం ఉగాది వరకు ఆగల్సిందే.

పల్లెటూరి వీరయ్యగా చిరంజీవి సందడి చేయనున్నారని సమాచారం. బాబీ దర్శకత్వంలో చిరంజీవి హీరోగా మైత్రీ మూవీ మేకర్స్ ఓ సినిమా అనౌన్స్ చేసిన విషయం తెలిసిందే. ఈ సినిమాకు సంబంధించిన స్క్రిప్ట్, ప్రీ ప్రొడక్షన్‌ప్రారంభించారు బాబీ. పల్లెటూరి బ్యాక్‌డ్రాప్‌లో సాగే ఈ ప్రాజెక్ట్ కి ‘వీరయ్య’ అనే టైటిల్‌అనుకుంటున్నారు. అలాగే ఆచార్య తర్వాత మోహన్ రాజా దర్శకత్వంలో చిరూ నటించబోయే సినిమాకు రారాజు అన్న టైటిల్ పరిశీలనలో ఉంది.

ఎన్నో పేర్లు ట్రెండ్ అయ్యాక…పవన్, క్రిష్ కాంబోమూవీకి హరిహర వీరమల్లు అనే టైటిల్ ను ఫిక్స్ చేసారు. ఇక రవితేజ, నక్కిన త్రినాథరావు కాంబో మూవీకి ఘరానా మొగుడు అనే టైటిల్ ఖరారైందని అంటున్నారు. మేర్లపాక గాంధీ డైరెక్షన్లో నితిన్ అంధుడిగా నటిస్తోన్న సినిమాకు మ్యాస్ట్రో అన్న పేరు ఫిక్స్ చేసారు. వరుణ్ తేజ్ గని, విజయ్ దేవరకొండ లైగర్…ఇలా ప్రతి సినిమా పేరులోనూ కొత్తదనం ఉండేలా చూస్తున్నారు టాలీవుడ్ స్టార్స్.

లాస్ట్ స్టేజ్ కి వచ్చేసింది ట్రిపుల్ ఆర్ . యాక్షన్ షూట్ తోపాటు ప్యాచప్స్ కంప్లీట్ చేస్తున్న RRR సినిమా షూటింగ్ అల్యూమినియం ఫ్యాక్టరీ లో కంటిన్యూ అవుతోంది. ప్యాన్ ఇండియా స్టార్ ప్రభాస్ ,బాలీవుడ్ డైరెక్టర్ ఓమ్ రౌత్ కాంబినేషన్లో తెరకెక్కుతున్న ఆదిపురుష్ సినిమా షూటింగ్ ముంబయ్ సెట్స్ లో జరుగుతోంది. విజయ దేవరకొండ సైతం ఇప్పట్లో ముంబై వదిలి వచ్చేలా లేడు. లైగర్ షూటింగ్ ఇంకా ముంబైలోనే చేస్తున్నారు పూరీ జగన్నాథ్.

చెర్రీ బర్త్ డే సందర్భంగా ఫస్ట్ లుక్ ట్రీట్ ఇచ్చిన చిరంజీవి ఆచార్య టీమ్ ప్రస్తుతానికి రెస్ట్ మోడ్ లో ఉంది. ఏప్రిల్ 2 నుంచి ఆచార్య సినిమా కోకాపెట్ లో మళ్లీ మొదలుకానుంది. పవన్ కళ్యాణ్, క్రిష్ కాంబో మూవీ హరిహర వీరమల్లు సినిమా షూటింగ్ అల్యూమినియం ఫ్యాక్టరీలో జరుగుతుంది.

నందమూరి బాలకృష్ణ బోయపాటి శ్రీను దర్శకత్వంలో నటిస్తున్న సినిమా షూటింగ్ బెల్గాం ఆశ్రమంలో జరుగుతుంటే, ప్రవీణ్ సత్తారు డైరెక్షన్ లో నాగార్జున నటిస్తోన్న సినిమా గోవాలో జరుగుతుంది. ఇక రామానాయుడు స్టూడియోలో శరవేగంగా దృశ్యం -2 షూటింగ్ కంప్లీట్ చేస్తున్నారు వెంకటేశ్.

మహేశ్ బాబు సర్కారు వారి పాట షూటింగ్ గోవాలో జరుగుతుండగా… ఇటలీలో ఖిలాడీ షూటింగ్స్ తో బిజీగా ఉన్నారు రవితేజ. అల్లు అర్జున్, సుకుమార్ కాంబో పుష్ప సీన్స్ ను టోలీచౌకిలో చిత్రీకరిస్తున్నారు. వరుణ్ తేజ్ గని సినిమా షూటింగ్ అన్నపూర్ణ 7ఎకర్స్ లో కొనసాగుతుంది. సాయిధరమ్ తేజ్, దేవా కట్టా సినిమా రిపబ్లిక్ షూటింగ్ కూడా హైదరాబాద్ లోకల్ లొకేషన్స్ లోనే జరుగుతుంది.

సుకుమార్ అసిస్టెంట్ డైరెక్టర్ బుచ్చిబాబు సిద్ధం చేసుకున్న కథను నమ్మి అవకాశం ఇచ్చారు మైత్రీ మూవీ మేకర్స్ నిర్మాతలు. వాళ్ల నమ్మకాన్ని ఉప్పెన బంపర్ హిట్ తో నిలబెట్టాడు బుచ్చిబాబు. అందుకే తనకు వాళ్ల సంస్థలోనే ఓ హీరోతో సినిమా చేసే అవకాశాన్ని ఇచ్చారు నిర్మాతలు. అంతేకాదు తాజాగా సానా బుచ్చిబాబుకు 60లక్షల రూపాయలకు పైగా ఖరీదైన మెర్సిడిస్ బెంజ్ జి ఎల్ సి కారును గిఫ్ట్ గా అందించారు మైత్రీ మూవీ మేకర్స్ వారు. ఈ తీసుకున్న వెంటనే తన గురువు సుకుమార్ ను ఎక్కించుకొని హైదరాబాద్ వీధుల్లో చక్కర్లు కొట్టారు బుచ్చిబాబు.
నిజానికి లాక్ డౌన్ ముందే దాదాపు ఉప్పెన చిత్రీకరణ పూర్తయింది. కరోనాతో థియేటర్లు మూతపడ్డాక ఓటీటీ నుంటి ఫ్యాన్సీ ఆఫర్లే వచ్చాయి నిర్మాతలకు. కానీ లాక్ డౌన్ ఎత్తేసి..సినిమాహాళ్లు ఓపెన్ అయ్యేదాకా వేచిచూసి కమర్షియల్ సక్సెస్ అందుకున్నారు. ఈ ఊహించని విజయంలో భాగమైనందుకు గానూ హీరో వైష్ణవ్ తేజ్, హీరోయిన్ కృతిశెట్టిలకు సైతం బహుమతులు అందించారు నిర్మాతలు. ఇప్పుడు డైరెక్టర్ వంతు వచ్చింది. సూపర్ బెంజ్ ఇచ్చేసారు. ఇక తర్వాతి సినిమా పెద్ద హీరోతో. ఆ హీరో ఎవరో..ఆ సినిమా మళ్లీ మైత్రీ మూవీ మేకర్స్ నిర్మాతలకు ఎలాంటి లాభాలను తెచ్చిపెడుతుందో..చూడాలి.

వరుస సినిమాలతో దూసుకుపోవడమే కాదు….అవసరమైతే హెచ్చరించడానికి సైతం వెనుకాడలేదు టాలీవుడ్ ప్రముఖ నిర్మాణ సంస్థ. ఎవరికో కాదు తనని సోషల్ మీడియాలో ఫాలో అయ్యే నెటిజన్లకు వార్నింగ్ ఇచ్చింది మైత్రీ మూవీ మేకర్స్. అసభ్య పదజాలంతో ట్వీట్స్ పెడితే బ్లాక్‌ చేస్తామని వార్నింగ్ ఇచ్చింది. ‘ఉప్పెన’తో 2021 ఆరంభంలోనే సూపర్ సక్సెస్ ని సొంతం చేసుకుంది మైత్రిమూవీ మేకర్స్‌. ప్రస్తుతం ఈ సంస్థ ఖాతాలో పెద్ద పెద్ద హీరోలు నటిస్తోన్న…నటించబోతున్న భారీ ప్రాజెక్ట్స్ ఉన్నాయి. దీంతో సినీఅభిమానుల చూపు మైత్రి ప్రొడక్షన్స్ వైపే ఉంది. తమ ఫేవరెట్ హీరోల సినిమా కబుర్ల అప్‌డేట్స్ కోరుతూ ప్రేక్షకులు మైత్రి మూవీస్‌ సంస్థకు ట్వీట్స్ కూడా చేస్తున్నారు. అయితే, కొందరు ఆకతాయిలు మాత్రం అసభ్యపదాలను వాడుతూ కామెంట్స్ కొడుతున్నారు. అందుకే హెచ్చరిస్తూ ట్వీట్ చేయాల్సివచ్చింది మైత్రి మూవీ మేకర్స్‌ వారికి. ‘అసభ్య పదాలతో ట్వీట్స్ చేసే ఆకతాయిల అకౌంట్స్ ఇక నుంచి బ్లాక్‌ చేస్తాం. హ్యాపీ సోషల్‌ మీడియా స్పేస్‌ కోసం అందరం చేతులు కలుపుదాం’ అంటూ తెలియజేసింది.

మెగాస్టార్ చిరంజీవి, నందమూరి బాలకృష్ణ ఓ విషయంలో పోటీపడుతున్నారట. ఇద్దరికీ ఒకే హీరోయిన్ కావాలంటూ సందడి చేస్తున్నారట. ఇదంతా సరదాగా తీసుకున్నా నిజానికి మాత్రం బాలీవుడ్ దబాంగ్ బ్యూటీ సోనాక్షి సిన్హా ఈ ఇద్దరు సీనియర్ హీరోల సినిమాల్లో హీరోయిన్ ఛాన్స్ కొట్టేసిందనే టాక్ వినిపిస్తోంది. ఆల్రెడీ రజినీకాంత్ వంటి సీనియర్ హీరోతో లింగా సినిమా చేసిన సోనాక్షి అయితేనే వీళ్లకి కూడా బాగుంటుందని అనుకుంటున్నట్టు టాక్.

చిరంజీవి, డైరెక్టర్ బాబీ కాంబినేషన్లో ఓ సినిమా రానున్న సంగతి తెలిసిందే. మైత్రీ మూవీ మేకర్స్ తెరకెక్కిస్తున్న ఈ సినిమాలో హీరోయిన్ గా సోనాక్షి సిన్హా హీరోయిన్ గా కనిపించనుందట. ఇటు మలినేని గోపిచంద్ దర్శకత్వంలో బాలకృష్ణ నటించబోతున్న సినిమాలోనూ సోనాక్షినే హీరోయిన్ అన్న ప్రచారం జరుగుతుంది. అయితే రెండు చిత్రాల మేకర్స్ ఇప్పటికే సోనాక్షిని కలిసారని…ఆమె కూడా పాజిటివ్ గానే ఉన్నట్టు తెలుస్తోంది. ఇంకా ఈ విషయాలకు సంబంధించి అధికారిక ప్రకటన రావాల్సి ఉంది.

మెగా ఫ్యామిలీ హీరో వైష్ణవ్‌ తేజ్ న‌టించిన ఫస్ట్ మూవీ ‘ఉప్పెన’ సూప‌ర్ హిట్ అయిన సంగతి తెలిసిందే. దీంతో ఆ మూవీ యూనిట్ తాజాగా విజయోత్సవ సంబ‌రాలు చేసుకుంది. హైదరాబాద్‌లో జ‌రిగిన ఈ ప్రైవేట్ కార్య‌క్ర‌మంలో సినీ ప్ర‌ముఖులు పెద్ద ఎత్తున పాల్గొన‌డంతో ఇందుకు సంబంధించిన ఫొటోలు సోషల్ మీడియాలో వైర‌ల్ అవుతున్నాయి. మెగాస్టార్‌ చిరంజీవితో పాటు అల్లు అర్జున్‌, సాయి‌ తేజ్‌, సుకుమార్ ప‌లువురు ద‌ర్శ‌కులు, నిర్మాత‌లు, మరికొందరు సెలబ్రిటీస్ సైతం ఇందులో పాల్గొన్నారు.

Image
ImageImageImage

ఆహా చిత్రం తాజాగా చెప్పినట్టు పవర్ స్టార్, సూపర్ స్టార్ నడుమ పోటీ అనివార్యమైంది. పవన్ కళ్యాణ్, డైరెక్టర్ క్రిష్ కాంబో మూవీ 2022 సంక్రాంతి కానుకగా విడుదల కానుంది. ఈ మేరకు అధికారికంగా విడుదల గురించి ప్రకటించారు మేకర్స్. ఏ ఏం రత్నం నిర్మాణంలో ఎం ఎం కీరవాణి సంగీత అందిస్తున్న ఈ సినిమాకి హరిహర వీరమల్లు అనే టైటిల్ ఖరారయ్యే ఛాన్స్ ఉంది. ఇప్పటికే తొలి షెడ్యుల్ పూర్తిచేసుకున్న ఈ ప్రాజెక్ట్… హైదరాబాద్లో ప్రత్యేకంగా వేసిన తాజ్ మహల్ సెట్లో రెండవ షెడ్యుల్ త్వరలో ప్రారంభంకానుంది. 17వ శతాబ్దంలో జరిగే ఈ కథాంశంలో పవన్ కళ్యాణ్ ను వజ్రాల దొంగగా చూపిస్తున్నారు క్రిష్.

ఇక వచ్చే సంక్రాంతికే రిలీజ్ డేట్ బుక్ చేసుకుంది సర్కారు వారి పాట. పరుశురాం దర్శకత్వం వహిస్తున్న ఈ సినిమాలో మహేష్ వడ్డీ వ్యాపారి పాత్రలో కనిపిస్తారని సమాచారం. అయితే ముందుగానే సంక్రాంతి సీజన్ లో కర్చీఫ్ వేసిన మహేష్ తో…తాజాగా పందెంలో దిగాడు పవన్. మరి చివరికి ఏం జరుగుతుందో చూడాలి.

రీసెంట్ గా 100కోట్ల క్లబ్ లో చేరింది ఉప్పెన. దీంతో నిర్మాణ సంస్థ మైత్రీ మూవీ మేకర్స్ అడక్కుండానే ఉప్పెన టీమ్ పై వరాల జల్లు కురుపిస్తోంది. నిజానికి 50లక్షల పారితోషకాన్ని వైష్ణవ్ తేజ్ తో మాట్లాడుకున్నారు. కానీ సినిమా బ్లాక్ బస్టర్ కావడంతో ఇప్పుడు కోటి రూపాయలు అదనంగా ఇచ్చారట. అంటే డబుల్ బొనాంజాలా మనీ అందుకున్నాడు వైష్ణవ్ తేజ్. అలాగే కృతిశెట్టికి సైతం 25లక్షల రూపాయలను బహుమతిగా అందించినట్టు చెప్తున్నారు.

ఇప్పుడు వరుస సినిమాలతో బిజీగా మారాడు వైష్ణవ్ తేజ్. ఇప్పటికే డైరెక్టర్‌ క్రిష్‌ కాంబినేషన్లో ‘జంగిల్‌ బుక్’‌ పూర్తి చేసాడు ఈ మెగా హీరో. ఇందులో రకుల్ ప్రీత్ సింగ్ హీరోయిన్. ఈ ప్రాజెక్ట్ తర్వాత అన్నపూర్ణ బ్యానర్‌లో ఓ చిత్రం..ఆపై భోగవల్లి ప్రసాద్‌ బ్యానర్‌లో మరో ప్రాజెక్ట్ కి కమిటయ్యాడు. నిర్మాత భోగవల్లి ప్రసాద్ నిర్మించబోయే సినిమాలో హీరోగా మొదట నానిని అనుకున్నారట. కానీ నాని రిజెక్ట్ చేయడంతో అదే కథతో సినిమా చేయబోతున్నాడు వైష్ణవ్ తేజ్.

PSPK 28 కోసం రెడీ అవుతున్నారు ఆర్ట్ డైరెక్ట‌ర్ ఆనంద్ సాయి. పవన్ కళ్యాణ్, హరీష్ శంకర్ కాంబో మూవీ కోసం తాజాగా రంగంలోకి దిగారు. తన కళా ప్రతిభతో సినీ ఇండస్ట్రీలో ప్రత్యేక స్థానాన్ని సంపాదించుకున్న ఆనంద్ సాయి… ఎన్నో అవార్డులు, రివార్డులు అందుకున్నారు. 5 సంవత్సరాల నుంచి ఏ సినిమాకు కమిటవకుండా తెలంగాణలోని యాదాద్రి శ్రీలక్ష్మీ నృసింహ స్వామి దేవాలయ చీఫ్ ఆర్కిటెక్ట్ గా బాధ్యతలు నిర్వర్తిస్తున్నారు. ప్రస్తుతం ఈ నిర్మాణం చివ‌రి ద‌శ‌కు చేరుకుంది. దీంతో మళ్లీ సినిమాలకు వర్క్ చేసేందుకు ఓకే చెప్పారు.
తొలి ప్రేమ‌ నుంచి మొదలుపెడితే త‌మ్ముడు, ఖుషీ , జ‌ల్సా వరకు పవన్ కళ్యాణ్ సినిమాలకు పనిచేసారు ఆనంద్ సాయి. ఇప్పుడిక హ‌రీష్ శంక‌ర్ డైరెక్షన్లో ప‌వ‌ర్ స్టార్ హీరోగా రూపొందనున్న చిత్రానికి ఆర్ట్ డైరెక్టర్ గా ఎంపికయ్యారు. ఈ కాంబో మూవీని నిర్మించబోయే మైత్రి మూవీ మేక‌ర్స్ సంస్థ ఈ విష‌యాన్ని అధికారికంగా ప్ర‌క‌టించింది. అయితే ఇంత కాలం తర్వాత ఆనంద్ సాయి…తన ఆప్తుడైన పవన్ కళ్యాణ్ సినిమాకు కళా దర్శకునిగా పనిచేస్తుండటం విశేషం. త్వ‌ర‌లోనే సెట్స్ పైకెళ్లనున్న ఈ ప్రాజెక్ట్…ఆనంద్ సాయికి రీఎంట్రీ చిత్రమనే చెప్పొచ్చు.